A Creba é una asociación composta por familiares de persoas con problemas de saúde mental, afectadas e persoas sensibilizadas coa problemática deste colectivo.

Na entidade realízanse intervencións no eido da saúde mental non cuberta polas institucións existentes, creando dende 1994 distintos servizos específicos.

A Creba xestiona diferentes recursos, fomentando unha atención psicosocial integral e integrada, tanto nos dispositivos comunitarios de rehabilitación psicosocial, ocupacional e laboral, como en alternativas residenciais.

Formamos parte de FEAFES-Galicia, a Federación de Asociacións de Familiares e Persoas con enfermidade mental de Galicia.

A Organización Mundial da Saúde define a saúde mental non só como a ausencia de trastornos mentais, senón como “un estado de benestar no cal a persoa é consciente das súas propias capacidades, pode afrontar as tensións normais da vida, pode traballar de forma produtiva e frutífera e é capaz de facer unha contribución á súa comunidade”.

Neste sentido, a OMS sinala que “non existe a saúde sen a saúde mental” e que esta é “primordial para a desenvolvemento humano, social e económico das nacións e esencial para outra áreas de políticas públicas como son a asistencia social, os dereitos humanos, a educación e o emprego”.

Os problemas de saúde mental deben entenderse como unha parte da vida e as circunstancias dunha persoa e non como un elemento definitorio, que anula o resto das súas capacidades.

Unha enfermidade mental é unha alteración de tipo cognitivo e/ou do comportamento, que afecta a procesos psicolóxicos básicos como a emoción, a motivación, a cognición, a conciencia, a conduta, a percepción, a aprendizaxe e a linguaxe. Isto ten unha consecuencia directa na capacidade de adaptación das persoas á súa contorna social e cultural.

É fundamental sinalar que os problemas de saúde mental poden tratarse, co obxectivo de que as persoas poidan ter a mellor calidade de vida posible.

Os problemas de saúde mental tratadas en A Creba son trastornos psiquiátricos que poden ser graves, como a esquizofrenia, os trastornos de personalidade, trastornos paranoides, psicoses, depresións crónicas e outras enfermidades que dificultan ou impiden o desenvolvemento das capacidades funcionais estandarizadas con respecto a tres ou máis aspectos da vida cotiá.

Os aspectos que máis poden verse afectados nestes casos son a hixiene persoal, o autocoidado en xeral, o autocontrol, as relacións persoais e familiares, as interaccións sociais e a recreación e o ocio. Tamén o desenvolvemento da autosuficiencia económica pola súa participación no desempeño laboral.